Chapter 1:

好可惜,園子溫既電影,往往都要係電影節,或者其他地方出既DVD先有機會欣賞到. 

Chapter 2:

上年由朋友借到係網絡界「聞trailer不聞main feature」既《自殺俱樂部》(Suicide Club)DVD,初次乍看只覺導演賣弄畫面,對社會既批判流於片面(有一段當時都令到我覺得呢套野相當做作,好似係講某主角係保齡球場見到一個俱樂部重要成員),小弟曾經相信園子溫呢位仁兄,或者只會係日本既Rob Zombie,賣弄血腥色情,講故仔能力就九流.

雖然我未有機會(意欲)去重溫呢套曾經令我都幾失望既作品,不過往後既《紀子之食桌》(Noriko's Dinner Table),《恐怖爆髮》(Exte)同《奇異人生馬戲團》(Strange Circus)就完全令我對園子溫刮目相看,尤其《紀》片,對現代家庭觀念扭曲既描寫就非常深刻,亦令我留意到呢個導演有一點同港式電視劇甚為相似:可以搞到幾大就幾大,甚或至比之更甚,迷戀於崩潰邊緣既tension.

稱《愛之剝脫》(Love Exposure)為園子溫既masterpiece?我就貪心少少,我更加想導演能夠係呢套接近完美既作品之上更進一步.如果我由本片故事大綱講起,或者又會係另一篇文章 - 索性引用日本某網民所言,集「愛、友情、青春﹑夫婦、家族、宗教﹑淚、KISS、Panties﹑盜撮、女裝、Lesbian﹑鮮血、性欲、勃起、殺人﹑原罪、基督、邪教、疾走、監禁、洗腦、救出」於一身.

開始講呢套戲之前,我要先利益申報一下:某程度上,我係受到「人生有幾可會連續係戲院坐四個鐘」既小朋友心態所驅使而選擇入場,但「夠膽」以片長作為賣點既電影,又好似真係買少見少.入場前,我為免重複今年四月睇《捷古華拉》(Che)果種半睡半醒既折磨,我同友人高舉Red Bull以振軍心.

Chapter 3:

與其話本片係園子溫既masterpiece,我相信話本片係園氏修成正果之作更為貼切.

果然本年早前HKIFF之後,一眾blogger對本片一致絕讚既評論係千真萬確,四個鐘頭後我行出戲院,對於用左$16.9買左罐Red Bull既愚昧行為心諗一句:做乜_.話本片全無冷場又未免過分誇張,但至少你會發覺本片長得有其原因.

睇完237分鐘後,第一個俾我既感覺係好似睇左幾套「好園子溫」既戲:

1.Yu(西島隆弘飾),Yuko(滿島光飾)同Aya(安藤サクラ飾)三個人既家庭背境,彷似係將《紀子之食桌》入面既倫理悲劇帶入另一層次;

2.片首Yu為重拾/拉近同爸爸既關係,基於個人成長背境而毫不考慮去搵「告解既理由」,最後學成一身好偷拍功夫,當中既笑中有淚,同《恐怖爆髮》既黑色幽默有三分相似;

3.瘋狂大笑過後,園子溫施展其日漸成熟既「血腥+批判」嚴肅戲路,令人念念不忘既有Yoko引聖經「哥前13」對「愛」所下既so-called不朽定義,到主角中後段竭斯底里單人匹馬去到Zero Church(戲中重要異端宗教組織)搵番Yoko,都近似《自殺俱樂部》既進化版本;

4.當然,片中園子溫只此一家既symbol,係《愛》片中比比皆是:成套戲分做5個Chapter,係高潮情節加入低音音效營做壓迫,係原本正常劇程之中出現(明顯地)不合常理之多血漿既cult片特色....等等等等.早聞本片片名放係大約前段較後既位置,原來個原因係要配合電影開首一直故弄玄虛既mircale,觀影時N著實俾園子溫既過人自信深深感染.

搞完一大輪eyes candy,原來今次園子溫最最中心思想「竟然」係講純愛,且效果出其地令人驚喜,實在令觀影完畢既N(半個園子溫追隨者)同友人(為237分鐘而捧場)異常咁興奮.

不過,《愛》片亦基於以上既原因,係某D場口接駁位交代就唔多清淅.小弟執筆前曾經瀏覽過幾位blogger對本片既一D comments,發現認為Chapter 4同Chapter 5接口留白太多既,原來唔只我一個.

Chapter 4:

本片之主打「純愛」,園子溫對呢樣野既處理就相對上膽大心細.對於呢一方面小弟有感而發:以片中Yu初次同Yoko邂逅時有生理反應為例,事後N就曾經有諗過呢個問題…其實對住自己認定既"the chosen one",有呢種反應真係真係好正常好現實,正如高登仔金句之一「口裡說不,身體卻很誠實」道理一樣,面乜鬼紅心乜鬼跳,扮X晒含蓄!?見到一個自己認定為心愛既人,但係完全冇性幻想性衝動,閣下又是否要檢討檢討呢…純愛crossover性既徵象,敢作敢為,呢樣或者亦都係令園子溫別樹一格既地方.

又,片中Yu係電影中後段為令Yuko醒悟既果種不惜一切(拿拿拿,絕對唔係公式荷里活電影打下嘍囉放下火果種),究竟又係咪同哥前13既內容不謀而合?有一個可能性,就係園子溫並不信奉任何教派或者任何理論對愛既詮釋,而選擇左借Yu既果種狂放,去表達自己本身對「純愛」既定義.N睇完後一邊對Yu既所作所為+大情大性深受感動,一方面對導演自家理解既「純愛」深表認同.

(對上一次感受到呢種感動,可能係前幾年睇DVD既《殺手蝴蝶夢》My heart is that eternal rose......)

「純愛」亦都係一種超脫平凡既好奇,呢種好奇撇除咸濕成分,係難以用文字去向另一個人解釋.片中Yuko一幕仿瑪莉蓮夢路式既反裙,一種男士固然係睇得相當興奮,但對於睇女人內褲當食生菜既Yu黎講有幾咁不得「了」,相信各位有份一齊笑既影迷們會深深體會得到.

多謝園子溫導演既誠實,如實咁表達左N呢種自以為正常,但講出黎會被人視為變態既純愛觀.

Chapter 5:

老老實實,呢套戲係N心目中,不論其所包括既題材之廣,片長,art direction,人性化等等因素都可以輕而易舉成為近幾年日本Cult片之冠.趁HKAFF加推31號場,各位係睇埋呢幾句之後,好拿拿聲去book定個靚位…至少真係有留心睇過我個blog既人,都未見過我咁落力去sell一套戲.