18-7-2009 九龍灣國際展貿中心演講廳

rundown(轉貼):

我有貨

半張飛

黑雨天白鋼琴

just let it go(新歌)

1984 (swing+陳子聰)

鐘樓駝俠(新歌)

魚蝦蟹(新歌)

宇宙洪荒

開始到最後

帝國大廈

大大公司 

電波少年絕食記(swing+校長)

愛情陷阱+夏日寒風(swing+校長)

encore:shut up

開首有幸搶先睇到《我有貨》既MV,入面都有幾多串星,而在場更有柏芝Wyman梁柄捧場,算係一個證明Swing由始至終未被大家遺忘既證據.不過,同行既朋友同我都認為如果開頭如果插首《大大公司》先既話,效果應該會好少少... 

或者我既膚淺性格始終都戒唔甩,成個音樂會我都不能自控咁比較佢地既新歌舊歌.個人意見,如果想從而家搵番當年Swing甚或Snowman既味,outcome或者會令人覺得唔係果回事,甚至Swing二子都係音樂會途中為太多新歌而道歉,自幽一默;而言,我所聽到同睇到既,係一隊仍然孩子氣十足,但風格更多變既Swing.新歌之中,N比較鍾意《Just let it go》同《魚蝦蟹》,前者曲風延續《1984》同《帝國大廈》果種Swing只此一家既情深演繹,加上以往同Swing合作無間既林寶「出山」填詞,造就一首久違既心靈雞湯類佳作;後者不論詞曲都玩味十足,由Swing既另一面-「好好玩」引申地球魚類所餘無己既sad but true事實.歌詞中以英文提及到唔少魚類,由最初"fishes"演變到最尾自我反省既"selfish"算係由Swing玩味風格帶出既既小小驚喜. 

同行偏激+死忠Swingfans T一早警告過我,呢個show絕對唔會有一秒廁所位,的確除左Swing係Jerald喉嚨痛既情況下,仍然有令各位長頸fans瘋狂既表現外,歌與歌之間既空檔亦俾二子既大唔透性格所好好利用,Eric不斷暗串Jerald曲藝未精云云,又或者結他手Wilson於每首歌曲完結後既solo都令在場各位會心微笑,大笑同喪笑...當中Eric曾經講過一句令全場嘩然既說話,內容大致上係講「commercial既野留番俾依家d歌手」..大家唔好諗多,話晒Eric本身都有同其他人作曲,不過有guts講D咁容易「令人誤會」既野既組合,我都諗唔到有邊幾隊.My Little Airport算唔算?

今次音樂會都算比預期中要短,但完show後既感覺,真係好滿足好滿足.或者係我識人少,身邊冇咩邊幾個知道香港樂壇曾經有過呢兩位大大大細路(雖然我早前都只係識得佢地比較出名果7,8首歌...),但眼見音樂會果陣大部分觀眾都全場跟住Swing唱佢地既舊歌,令到N有一種難以言喻既感動,希望以後唱K時獨唱《黑雨天白鋼琴》既機會,會隨住二人今次復出而減少.

正如其他Swing fans所講,「佢地兩個一齊唱就有化學作用,是但無左一個都係差D」.以上或者並不是(或因為「時代變遷」而成為非必要條件)每隊組合成立/立足既minimum requirement,但近代能夠去到呢種級數既組合,除左Swing之外我暫時仲未諗到.

Let the Swing keep swinging,for...anybody who loves music sake.