請原諒我惰性大發,同時將兩套唔同年代,但都同Lak哥有關既電影相提並論.

四月初期,王昌新作«金錢帝國»展開鋪天蓋地式宣傳,英文片名I Corrupt All Cops大玩食字,曾經叫本人期待非常:始終王昌自從同麥子善合導既«黑白森林»(Colour of The Truth)後,實在冇咩邊幾套叫人提得起興趣,但當咸濕導演遇上男人主導既貪污題材,又令到膚淺既N立即忘記左甚麼色狼呀,賭聖呀果D前塵往事.(有人曾經介紹過«瘦身»一片予小弟,不過我到今時今日都仲冇機會睇到.)

習慣做足功課先入場既我,藉住呢個機會搵番「巧合」同《金》片雷同既《五億探長雷洛傳》(Lee Rock)先去了解一下貪污既ABC.從現今角度而言,《雷老虎》資料搜習方面之用心實在叫我呢位後八十年代既小朋友大開眼界:最明顯既証據,或者就係我睇《雷》時成日要睇字幕先知成班潮洲佬講緊咩.

本人一直深信每場電影中既衝突場口,一旦未能成功凝造到果種足以令你投入得毛管直豎既壓迫感,果場戲變成大婆台家變式鬧劇既機會率會係十成;而《雷》片中蝦叔同秦沛係差館正面開拖一幕,果下壓場感好似呢幾年黎既港產片都冇辦法搵得番,而片中抽寫Lak哥成魔之路既部分亦都非常好睇.另一方面,雖云《雷》於帶出當年紙醉金迷感覺方面猶見力有不遞(可能受制於電影本身係一套人物傳紀,理應講主角點樣上位法,而非交代主角如何享受生活),但單純以人物傳紀角度出發,直至今時今日依然係港產片中少見既高質素,愛情、事業隻線鈙述亦見導演分配恰當,難怪能夠推出一set出左成三四年個價仲企到硬一硬既DVD box set.

良久,本人懷住極大既期望去白官戲院捧晶哥場,結果當然係好失望.

丫,對唔住,我應該配合電影本身既語氣:我係好X失望.同行朋友C解釋,本人失望既原因乃係我將《金》片誤當為一套人物傳紀片去睇咁話.的而且確,電影希望能夠做到大婆台氣勢磅薄家族衝突年度鉅獻既最大共通點,亦即係個個都可以係主角;而言,《金》出到黎俾盾我既感覺係四頭唔到岸:細九(陳奕迅飾)呢個角色作為電影既一個作以穿針引既人物,理應作低調處理,但...我真係唔係好明白點解套戲要用咁多時間(或相對上多)去講佢既感情線,當中一幕同劉洋循環遊車河更大膽採用80年代MV電影式處理手法,實在令本人非常想即場界櫈.

火麒麟(黃秋生飾)呢個角色,應該係我睇完覺得係最正常既一位.此君本性火爆咸濕但帶有三四分正直傻憨因子,角色設定略帶騎呢,可以話係為秋生度身訂做.至於韓志邦(方力申飾)一角,驚喜都算係有既,至少方生徹底放棄左「仆街America」式浮誇演技(詳情請參看電影《得閒飲茶》),而角色本身亦冇對演員既演技有特別需要,合格.

講起Lak哥(梁家輝飾)我就扯火喇.冇錯Lak哥係潮洲人,但梁家輝果D潮洲話同演技似足任因九進化版上身,完全過左火位.唔係人物傳紀呢點本人非常明白,但《金》片俾我感覺似乎係編導演三方聯手將Lak哥打落凡間,淪為一個令本片榮升IIB級既普通潮洲怒漢.想睇Lak哥同ICAC抗衡既人如我,過來人意見,反正睇《父子情仇》同《金》都會令到你覺得到喉唔到肺,咁不如索性睇《父》既上半部加上《金》既下半部-如果你同我一樣,都係唔多接受到郭富城或黃秋生果D忽然自慚形愧既急促轉變的話.

關於《金》片,N仍然有十萬九千七百樣缺點想講:對ICAC既刻劃非常兒戲(其實就有人話七十年代關於ICAC既事跡幾近係野史,yahoo有個comment寫得好鬼中point),豬油仔由Lak哥得力助手淪為王晶真人show等等,但都係果句,凡事留一線...我仍然對拍過《賭城大亨》既王晶充滿信心架.

不過呢,食字呢家野唔係套套戲都岩,誤導左我呢種咁麻煩既觀眾就唔係咁好啦.

P.S.收筆前利益申報一下:既然《雷老虎》> «金錢帝國» > 《父子情仇》,你唔係expect呢篇文仲有下文下話!?