第一次睇到《四仔棒棒堂》(zack and miri make a porno)嘅電影海報,一種莫名奇妙嘅親切感忽然湧現.

Elizabeth Banks!就咁聽落個名你未必知道佢係邊個,但假若我同你講「哩,《魔蟲口入》(Slither,N最愛嘅cult片之一)入面成日着住睡衣位女主角囉」,你或者會有少少印象.

如果閣下有睇過Slither,相信會同N一樣對銀行姐姐徹頭徹尾不顧形象嘅演出印象深刻-直至《四》片出現,基於本人深感能夠喺香港遇上兩套由一位自己情有獨鍾嘅演員擔正嘅電影實屬緣分,就覺得好應該支持吓.

好可惜,有咁大塊珠玉(Slither)在前,銀行姐姐喺呢套片種瞹昧得很嘅電影自然相對失色,淪為Stephy喺葉念琛大導演精心調教下嘅浮誇式流水作業行貨-但至少佢咩片種都願試嘅呢種精神仍然令N深深敬佩.

片種定位曖昧,大概係每一套電影最唔應該犯上嘅毛病:《四》片由頭到腳都包裝/被包裝成走偏艷情嘅路線,out come就變咗一部片首講兄弟情(男女主角為拍四仔嘅一切所須欠落一身人情債),中段講艷情(原有重點宣傳部份),尾段講愛情嘅奇情四不像電影.

換個角度睇,《四》片呢條望似老土兼夾極度戲劇性嘅flow或者係導演用心良苦嘅設計,激勵一啲經歷緊片中主角同樣遭遇,亦即窮困嘅朋友;但對自以為「飽食人間煙火」嘅N嚟講,此片又別具另一種意義.

喺能夠安安穩穩坐低睇《四》片前兩日,N仍然同兩位同學(或者叫佢哋做朋友會好聽好多)為final project忙到趴喺度-當中同我比較熟絡嘅T一向樂觀過人,得閒無事鍾意同人炫耀(!?)佢碌爆一張又一張卡嘅威水史,而佢撞板嘅次數計落都爭我好多餐飯.

T嘅經歷正好係《四》片嘅逆轉版:project deadline前四日忽然遭受感情挫折,呢次亦係我識咗T以來佢最徹底崩潰嘅一次-不過,佢喺呢個時候仍然會喊住打俾我叫我send嘢過佢,繼續趕工(諗起其實都幾心寒).雖然講落都覺得嘥氣,但作為你嘅朋友,希望T有一次真係會聽我講,改變吓自己嗰種咁容易信人,咁容易不甘寂寞嘅性格.

喺《四》片中,其中一個老X土嘅橋段講述由銀行姐姐飾演嘅Miri由High school到而家出到嚟社會大學仍然對一個男同學念念不忘,直到一次同學聚會先至發現嗰個男仔經已孿咗.雖然話就話係電影橋段,不過我想同T講嘅嘢係你真係係時候要醒覺.無了期嘅惡性循環同種種不停湧現,令到你思前戀後嘅因素,其實一直暗示緊你要改變.長情一方面可以好淒美,另一方面亦都可以好笨X.

成個project令到我最困擾嘅,反而係同另一位親愛嘅組mate R嘅相處-我同佢由當時到現在都真係冇乜點熟絡過,但嗰陣時值倒數階段,我一心諗住只要其中一個人破壞咗我對"teamwork"呢個字嘅定義,sorry,邊個都冇面俾.

有啲嘢可能就係整定:R一直所做嘅嘢,正正同我以上提及嘅「project剋星」嘅特徵不謀而合,但直到佢「終於」接我電話而俾我小爆一輪之後,收線嗰一剎我忽然覺得自己實在太自私,尤其對方係一個已經成日冇瞓過嘅(身形矮細嘅)女仔.

R同《四》片中嘅Zack(Seth Rogen飾)都分別教曉咗我一個道理:不論情況有幾咁差,總會有值得自己不惜一切去死守嘅執着.「敬業樂業」嘅Zack,喺執導決定自己生死存亡嘅四仔時堅守「魔鬼在細節之中」嘅真理,例如喺一場咖啡店客座嘅sex scene,就將咖啡豆倒喺男女主角嘅身上.呢啲細節或者未必能夠令到佢千瘡百孔嘅導演功力起死回生,但就成功令到呢套coffee shop porno series一再添食;而當時R嘅執着喺我眼中非但不切實際,難聽啲講句甚至係破壞成個teamwork嘅罪魁禍手,但佢選擇咗連自己msn都要打埋「好想喊」嘅時候仍然堅持落去,令到最終做得最靚靚仔仔嘅係佢,deadline前一日最早有得瞓嘅,又係佢...

《四》片雖然笑料低俗兼夾硬滑稽,劇情亦老土到毛管戙,但某程度上對於遭逢困境嘅人,與及溺愛於小事化大嘅X街(即本人),喺觀影時不其然覺得「心口乸住乸住」.