Al Pacino同Robert De Niro近期聯手合作電影"Righteous Kill",初初拎起隻DVD望到個封面已經深感奶嘢味濃,冇晒胃口,估唔到坊間差不多一面倒地劣評,再一次證明大卡士唔係大晒.
或者你會覺得N已經江朗才盡,開始拎啲屢見不鮮嘅現象大做文章,但呢種現象嘅可愛之處就係順理成章咁烘托出一堆卡士唔強嘅好電影.
連續睇咗《追擊者》(The Chaser)同《野獸》(Running Wild)兩套韓片,情況正正符合以上所講嘅現象:《野》由深得香港萬千師奶歡心嘅誠俊哥權相佑同《原罪犯》(Old Boy)食腦大奸角劉智泰主演,片長亦超越咗N嘅140分鐘心理關口,理應係套驚天地泣鬼神嘅「火爆警匪大片」,但每一套極速能夠喺香港收費電視出現嘅電影,喺速度背後一定有其原因...
好不幸地,《野》片犯咗樣N無法原諒嘅地方:呢套嘢開頭嗰吓明明就係同你sell硬橋硬馬式動作,打吓爛仔交咁樣,點知之後嘅時間就用晒嚟交代嗰個講番都覺得煩到仆x嘅黑幫勢力分佈/關係圖...如果呢套係一套食腦戲,上述情況其實完全可以理解,但此片「精彩」之處就係當觀眾睇到最尾嘅時候,會發現之前用嘅腦汁真係嘥晒,講晒粗口.大佬,你將件簡單嘅嘢複雜化我已經唔同你計,你仲要搞埋晒呢亭懶係玉石俱焚嘅ending就真係...唔x得囉.
《野》片導演試圖用複雜黑幫關係凝造「套戲冇個好人」嘅氣氛,可惜到頭來非但令觀眾一頭霧水,亦間接顯露故事主線嘅薄弱乏力.誠俊哥今次難得拋下身段,演繹一個做嘢完全唔諗後果嘅核突佬,作為觀眾,雖然睇得出佢好用心力去做好件事,可惜劇本嘅不濟令佢所花嘅努力接近白費,臨近片末一場喪禮痛哭更令賤賤格格嘅N當場爆笑.sorry誠俊哥.
為避免出現老土嘅「比較式過渡段」情況,N打算用呢段申報吓利益:或者《追》片兩位主角其實好紅,但總之我喺睇完套戲嗰一刻到而家,我連佢哋其中一個嘅名都嗡唔出,亦間接做就呢篇夾硬攞兩套戲嚟比較嘅文章.
相對《野》片嘅黑幫仇殺<-->黑幫仇殺,《追》簡單直接嘅故事主線正正係最吸引N呢種唔帶腦睇戲嘅懶人嘅地方:全職扯皮條嘅前任警察俊浩,旗下一位小姐捲入咗望遠洞一帶當時經常出現嘅妓女失蹤事件,其後經過一輪追逐,兇徒雖然被成功緝拿,但俊浩嘅行事手法非但得唔到警察信任,派去服侍條變態友位小姐又失蹤埋,加上兇徒似懵非懵嘅態度,令俊浩可謂賠了夫人又折兵.
片中嘅動作場口唔可以話多,但每場追逐導演都處理得緊湊非常(大佬,唔係吓吓掹槍都大晒加嘛..),文戲方面亦都不失張力,當中尤以一場兇徒同檢察官嘅對話為N睇到最肉緊嘅地方,而呢幕亦證明即使一位殺手能夠有如《七宗罪》(Seven)果位John Doe(Kevin Spacey飾)咁變態都好,都唔會完全稔滋滋到受到人哋出言侮辱時,仍然能夠保持果種「睇你幾時俾我玩謝」式嘅友善笑容.
《追》片導演除咗能夠喺主流嘅變態+無定向式殺手電影注入新驚喜,片中亦處處流露韓片只此一家式嘅人情味:片首曾提及俊浩其時陷入財政困難,迫於無奈派遣抱恙在身嘅小姐美珍服侍揀極都冇條女啱心水嘅麻煩客(亦即兇徒),當然一個男人點都會擔心一個弱質女流喺呢個妓女連環失蹤時期嘅安危,遂着美珍多加留神,直至美珍後期生死未卜,俊浩亦自覺有責任(雖然唔多唔少都出自愧疚)照顧美珍果個煩到喊嘅女...至少N從來冇諗/睇過一套公式電影度,一位核核突突、咸咸濕濕嘅扯皮條會做呢啲嘢.
另一方面,《追》片嘅人物角色形造亦更見心思:兇徒喺片首唔聲唔聲將美珍迫入困境,到後來俾檢察官篤穿一切行兇動機只係對身體缺陷上一種純粹嘅發洩,徹頭徹尾令觀眾一邊髮指一邊不寒而慄;而俊浩片中喺財政/業務/執法制度上所遇到嘅遭遇,與及對小姐美珍果份關顧,亦令N非常感動.
兩片共通之處,就係睇完之後嗰種性質相異嘅絲絲無奈:《野》片先天性低能嘅起承轉合已經令人感到十萬個O嘴,最尾劉智泰無嚟啦更變成另一個誠俊哥,其實寓意何在呢...先不論導演係咪想帶出所謂嘅「因遇到客觀嘅不可抗力因素而變成另一個人」意識,呢種強硬嘅「大快人心」結局對N而言已經接近「你講晒,你贏」嘅程度,到最後只能無奈概嘆此片白白浪費咗自己兩個半鐘頭,同埋一組咁好嘅陣容;至於《追》片,雖然貫徹呢幾年韓國常見嘅「只差一點點」式結局(至少我會認為《原罪犯》都係玩緊類似嘅嘢),但觀眾受導演精心嘅人物心理刻劃薰陶一輪後,此時此刻經已完全代入俊浩嘅心境,觀影後猶有餘韻纏繞不斷,唔會睇完套戲淥完個麵後就冇咗件事.
睇完兩套水準迴異嘅戲,我深深了解到過去嘅我係何其膚淺:只要有兩個男主角擔演一忠一奸角色,有追逐,有無數咁多個第三者死亡嘅戲就係警匪片.往後,我會同我親愛嘅朋友們表示《追》同《殺人回憶》(Memories of Murder)呢種後《七宗罪》片種,仍然會係云云韓片最剎食嘅一環.
P.S. 1 我開始明白點解咁多鬼佬偏愛縱橫於香港嘅大街小巷:《追》片Opening一幕由車內拍攝韓國大大小小商店,對之前曾經去過韓國,但可惜同蔡妍緣慳一面嘅N嚟講,對呢啲商店嘅印象係啲火星文足以鋪滿整個舖面,R爆頭得嚟又別有特色.
P.S. 2中學時代上會計堂,科目老師曾經大讚《原罪犯》一片,對之冠以「神作」之名,並由此得出「一套商業電影必須具備『衝突』同『性』呢兩種原素」嘅結論.睇完《追》片後,我任意將呢句說話斷章取義,理解為「『衝突』係一套好電影不可缺少嘅一環,甚或係其根基.」
嗯,《海角七號》(Cape No.7)都有好多人事上嘅衝突吖...
