第一次聽到My Little Airport(MLA)嘅歌,係嚟至彭浩翔三年前嘅電影《公主復仇記》.

「我間中仍會想我們會見面,在那間紅磡近黃埔的商店.」配合《公》片跳脫嘅鏡頭,MLA就好似不斷同你講緊「嗱,呢啲咪叫cafe歌囉.」

我以前覺得「cafe歌」係代表開心/唔開心都啱聽嘅歌.睇完《公》後反覆loop住隻《在動物園散步才是正經事》,also known as MLA最「正常」嘅album,先發現自己多年嚟俾港産pop嘢華麗鋪排洗腦後,仍然有幸聽到/愛上咁清新嘅曲風.

鍾意MLA嘅第二個原因,大概係佢哋每首歌嘅歌名,甚至album名同cover art,都有無窮無盡嘅含意.縱然p(曲+詞+編)同Nicole(Vocal)經常重申「MLA嘅歌離不開暗戀同自殺」,但佢哋就好似有能力將同一個故事,用唔同嘅方式一次又一次同聽眾細訴.

「我愈想你，我就愈想你，做什麼都沒有心機。」

「我愛你，我要帶你返屋企，我不要等你，我不要在msn等你。」

歌詞極盡簡單,但正因為呢種坦蕩蕩嘅心跡,比起大路情歌三四五六七角戀嘅無病呻吟,更加有血有肉,更加「到」.

有人話過MLA嘅歌,最適合喺情緒低落嘅時候聽.曾經我係一個喺ipod「最喜愛的歌曲」playlist不斷尋求情感宣洩嘅人,開心時就扭到volume最盡勁焚band sound,唔開心就一大堆Tanya/Norah Jones/Swing...惟獨MLA有本事將唔同種類嘅曲風悲劇化.sweet如「悲傷的採購」,rock如「讓我搭一班會爆炸的飛機」,都令每位失落/沮喪嘅聽眾搵到心靈上嘅慰藉.

生活唔容許我做到陳慧嫻搭夜機一走了之果種灑脫,惟有遭逢唔開心時去呢個小機場搭一班航機,喺四日三夜嘅行程度沉溺喺悲劇人物嘅角色,暫停一切然後再開始過.