七人一個卜戴倫 - Untitled (觀.映.雜.作)

N | 6th Sep 2008, 21:49 | 影 | (327 Reads)

對於今次呢篇I'm Not There嘅主題,我認真思量過一晚,最尾都係苦無頭緒.

(一)

或者今次「被逼」取名無題,正係一個合時嘅報應,體驗番自己一句謬論:「越係對一樣嘢迷戀,就越難用上自己嘅文字,向其他人清楚詮譯果『一樣嘢』為何物.」

我要老老實實承認,睇《七》當日我冇帶個腦去戲院,到散場時同其他人一樣一頭霧水,果一剎那只知自己深深被此片嘅唯美、型格畫面所吸引.

幸而,同行嘅朋友D一早做足功課,花咗成個鐘頭向我解釋片中無數謎團,以及相關嘅典故.

平心而論,《七》片導演Todd Haynes作為一個Bob Dylan嘅Die Hard Fans,「睇完套戲一頭霧水」並非由於Haynes表達能力嘅問題,亦非因為本片「Fans向」;相反,Haynes希望更多觀眾會對自己嘅偶像產生興趣,故意加快影片節奏,留低形形色色嘅伏線俾觀眾自行發掘,從中透過文字/音樂一齊愛上Dylan.

Haynes亦非林海峰口中「忠實而盲目」嘅一類Fans.喺《七》片中,有一幕講述Jude Quinn(Bob Dylan片中「分身」之一,Cate Blanchett飾)企喺十字架面前,對住耶穌問:"How does it feel?"-起初,我對Haynes夠薑拍呢一幕深表佩服,但諗深一層,呢幕或者係Haynes對Jude所作所為嘅間接控訴.

就喺D不斷用佢部IPod嘅"Dylan database",耐心同我解釋片中伏線之時,我內心暗地裏自語:Haynes已經完完全全做到咗「一個Fans可以為佢偶像做到嘅嘢」.

(二)

當然,要清晰解讀《七》片,相信唔會有太多人,甚或至只有Haynes本人做到.

令到我一頭霧水嘅云云原因之一,主要係片中錯亂嘅時空,令我對六位主角嘅時序產生少少confusion.然而,D對於我呢個疑惑嘅答案係「毋須執着」.

要查根究底角色時序,Google固然能夠將我嘅疑惑迎刄而解,但我有一刻忽然諗通咗:我睇嘅戲唔係叫做Memento,冇人要求你要將所有時空正確排列.

我對《七》片可謂係毫無保留嘅鍾愛,但對於Yahoo其中一個對本片嘅劣評甚有同感:「…隨時停下來,都可以當成結局.」的而且確片中每個”Dylan”差唔多冇連貫性可言,若果本片係一套着眼於box office嘅商業電影,Haynes呢種「手法」,名副其實係不理觀眾死活;但本片作為Haynes一篇關於Dylan嘅essay,Haynes就實驗咗「以無法為有法」(角色冇連貫性),俾觀眾喺每個”Dylan”各自迵異嘅性格中,體驗「人格分裂」嘅Dylan傳奇一生.

《七》嘅Trailer曾經出現過Dylan一語”All I can do is be me,whoever that is.”印象之中,唔少artist(藝術性或娛樂性)都有特別強烈嘅自我維護傾向,情形有如呢個禮拜不斷聽到同學講「我哋呢啲Design人,驚咩吖,做咗先算…」事實上,「Design人」一語就係詮譯緊”All I can do is be me”嘅含意,而Dylan呢句說話,對Dylan本人事業上嘅高潮起迭,以及對Haynes作為fans,盡心盡力去拍攝偶像嘅一生(不論採用嘅電影語言有幾特別),都有特殊嘅意義同價值.

(三)

Haynes對Bob Dylan嘅崇拜,絕對係無容置疑-去番Dylan曾經表演過嘅coffee shop取景,刻意模仿Dylan第二張專輯The Freewheelin' Bob Dylan嘅封面….等等等等.

我諗Haynes都曾經同我諗過同一條哲學性問題:攞走一個人嘅生命,擁有佢嘅軀體,先稱得上完全咁佔有果個人.《七》片中, Haynes故意喺影片開始時,同Jude搞咗一個簡單得可以嘅假喪禮,繼而大條道理作狀解剖Jude.

就咁睇我以上呢番說話,或者有人會對N同Haynes冠以”psycho”一名.其實,作為一個fans希望了解更多關於偶像嘅一切一切,根本正常不過.

Dylan一生變幻無常,唔同時期嘅性格各走極端,係典型「唔想俾人知道我諗緊乜」嘅一類人.片中BBC記者Jones作為普羅大眾嘅代表,自然對Jude窮追不捨,希望滿足一群視Dylan為Judas嘅人,揭開Jude虛偽嘅一面.

對於Haynes故意將Jones同Jude嘅抗爭放大,外國一篇關於《七》片嘅review,就寫道”the interviewer is a reductive prig, but Jude is a self-important asshole.”唔知呢個係咪Haynes對Jude時期嘅Dylan嘅睇法?

接近片末時,曾經出現過一個Jude有如氣球咁吊喺半空中,隨風擺動嘅畫面(blowin’ in the wind !?).有人認為呢個畫面,暗喻Jude表面上我行我素,實則受盡身邊朋友擺佈;然而,呢個畫面同我嘅座右銘有少少相似:人一定要尋求屬於自己嘅路,我自行我路同時,亦要懂得保護自我;一旦自己最core嘅思想被人揭穿/攻陷,軀體就有如淪為空殻,同Jude一齊飄浮喺空中.

Haynes嘅假喪禮對比起Jones,就顯得十分政治正確:希望了解Dylan更多嘅同時,亦謝絕所有生安白做,竭力保護Dylan嘅core思想.

(四)

Todd Haynes,你今次成功喇.我忍唔住由心而發講一句:「我愛死I’m not there,愛死Bob Dylan,愛死Cate Blanchett.」假以時日,我一定會買返隻"No Direction Home: Bob Dylan"DVD,同呢套戲做一次補完.

當然,期待《七》嘅DVD.