開學前又再一次遇見R.唔同嘅係,今次佢除咗大手筆咁帶咗dunhill俾我做手信之外,面上亦帶住一絲絲嘅頹唐.
R係我一位由F.2開始認識嘅好朋友.當時我哋冇諗過乜嘢「一生一世」,只知道對方係果種「乜鬼嘢戲都會同我睇」嘅朋友.時至兩年前,R毅然決定到澳洲升學,曾經令我哋兩個失去聯絡-經歷過呢件事之後,我同R彼此都更加珍惜呢段友誼,由以往嘅只談風月,到而家相互之間分擔學業,人際,前途.(天呀...點解我啲best friend全部都唔喺香港讀書...)早前同幾位朋友一齊同R洗塵.眼見R反應遲緩,四肢無力,皮笑肉不笑,大家都意識到再帶佢去諾士佛臺直落,盞搞.我哋當晚力圖將R同酒精分隔,於是編排咗茶餐廳--->機舖--->糖水舖呢個自以為天衣無縫嘅行程.勢估唔到一向視打機為命根嘅R,竟然冇心機到一行入機舖就話要出去整番飛...「男人煩嘅不外乎兩樣嘢!」同行嘅C君即席大發偉論.「何況錢銀呢樣嘢佢不嬲都唔需要點愁,N你咁醒目實知道我講緊咩.」
的而且確,對唔少男生嚟講,能夠有如《鬥智21點》(21)嘅一眾主角咁樣有樣有腦有錢有女,係一件何其夢寐以求嘅事.《鬥》片主要講述主角Ben(Jim Sturgess飾)就讀於麻省理工學院(MIT),喺為學費筆錢而煩惱嘅時,俾教授Micky(Kevin Spacey飾)留意到佢喺數字上嘅天賦,遂被邀加盟以Micky為首嘅「賭城搵銀團」,利用必勝公式於每個牌局大獲全勝.可惜,《鬥》營造嘅「鬥智」氣氛欠真實性及說服力,影片本身亦過份冗長,死要扭橋,做戲咁做.唔少好似我咁天真無邪嘅人,滿心期待會喺《鬥》學到一招半式,睇完套戲到頭嚟淨係想講一句「X,講X晒啦你.」
我經常同朋友講,每當睇完一套戲,假若認為需要將影片憑藉個人觀感重新分類,套戲唔係好好,就係好差.我將原屬劇情片種嘅《鬥》歸類為「奇情片」,乃由於影片宣傳手法超卓,成功包裝本片為「搵食靠食腦」一類電影,點知編導偏偏將「必勝公式」輕輕帶過,慳水慳力程度令人認為公式根本手到拿來(事實上,本片男女主角關係嘅發展亦十分之令人費解),到最尾反而講一大輪人性有幾醜惡,有幾得人驚嘅口水嘢.
《鬥》惟一觸動我嘅地方,或者係Ben喺成魔前後同身處絕境時,同兩位毒男朋友之間嘅友誼:好朋友同錢財/伴侶一樣,太容易得到就唔識珍惜.影片中段Ben身家暴漲,心入面除咗充斥住錢之外,已經再容不下其他一切.喺呢個時候Ben為求切身利益,第一時間同果兩位外貌不揚嘅老友一刀兩斷;然而故事繼續發展,喺Ben孤苦無依,冇人冇物嘅時候,繼續支持佢嘅仍然係果兩個毒男.撫心自問,大家都唔係乜嘢聖人,先唔好講到賣友求榮咁嚴重,都曾經試過有意無意冷落知心好友.人類經常話要好好珍惜呢樣果樣,但往往都係喺「擁有--->失去--->擁有--->失去」嘅惡性循環度浮沉數十載,歷經生命中嘅最痛,先能夠真正學懂珍惜.
O Camp時有一位teammate經常同我講:「錢解決到嘅問題,就唔係『問題』」.除非你好似Ben咁有過人嘅才智,不論喺職場定賭場,「錢搵錢」呢個法則時至今日仍然冇辦法被推翻.以錢換錢,喺稍有家財嘅人眼中,錢財根本唔係問題,「只係」令所有貧民階層頓覺生不如死嘅煩惱;尋求真愛亦不見得容易,雖然話就話你有錢/你靚/你夠sex appeal能夠幫助你成為情場殺手,佢哋解決到愛/慾需要上嘅問題,但呢啲人嘅「伴侶」往往留唔得耐,Main Point:「伴侶」不等如「另一半」.究其實,對佢哋或普通人嚟講,搵到「另一半」都係「煩惱」,唔係「問題」.咁,兄弟呢?
果晚,我跟隨R行出機鋪,兩個傻佬坐喺集X門口吹水.作為朋友,我「循例」又掟一大堆「樹同森林」、「女死女還在」嘅行貨俾佢.之後,佢點起咗果晚最後一枝煙:「我越嚟越覺你係我最好嘅朋友...」縱然呢刻無聲勝有聲,我仍然夾硬回佢一句:「我以前都唔信『人越大越難識朋友』呢啲嘢,但我慢慢先發覺,我哋根本冇得唔相信.」佢聽完之後諗咗一陣,呼出一口煙,同我相望而笑.
